ଅର୍ଜୁନ ତେନ୍ଦୁଲକର-ସାନିଆ ଚଣ୍ଡୋକ

ଭୁବନେଶ୍ବର() ଭାରତୀୟ କ୍ରିକେଟ୍‌ର କିମ୍ବଦନ୍ତୀ ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ ତେନ୍ଦୁଲକର ଏବେ ସବୁଆଡ଼େ ଚର୍ଚ୍ଚାରେ । ମାର୍ଚ୍ଚ ୫ ତାରିଖରେ ବିବାହ ବନ୍ଧନରେ ଆବଦ୍ଧ ହେବାର ମାତ୍ର ଦିନକ ପରେ ଅର୍ଜୁନ ପୁଣିଥରେ କ୍ରିକେଟ୍ ପଡ଼ିଆକୁ ଫେରିଛନ୍ତି । ତାଙ୍କର ଏହି ନିଷ୍ଠା ଓ କ୍ରିକେଟ୍ ପ୍ରତି ଅଫୁରନ୍ତ ପ୍ରେମ ଦେଖି ପ୍ରଶଂସକମାନେ ତାଙ୍କୁ ଖୁବ୍ ପ୍ରଶଂସା କରୁଛନ୍ତି ।

ବିବାହ ସମାରୋହ:
ଅର୍ଜୁନ ତେନ୍ଦୁଲକର ମାର୍ଚ୍ଚ ୫ ତାରିଖରେ ପ୍ରସିଦ୍ଧ ବ୍ୟବସାୟୀ ରବି ଘାଇଙ୍କ ନାତୁଣୀ ସାନିଆ ଚଣ୍ଡୋକଙ୍କ ସହ ବିବାହ କରିଛନ୍ତି । ଏହି ବିବାହ ଏକ ବ୍ୟକ୍ତିଗତ କାର୍ଯ୍ୟକ୍ରମରେ ହୋଇଥିଲେ ମଧ୍ୟ ଏଥିରେ କ୍ରିକେଟ୍ ଜଗତର ଅନେକ ଦିଗଜ୍ଜ ସାମିଲ ହୋଇଥିଲେ । ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂହ ଧୋନୀ ମଧ୍ୟ ଏହି ଉତ୍ସବରେ ଯୋଗ ଦେଇ ନବଦମ୍ପତିଙ୍କୁ ଆଶୀର୍ବାଦ ପ୍ରଦାନ କରିଥିଲେ । ସାନିଆ ଜଣେ ପେଟ୍ କେୟାର ସେଣ୍ଟର ଚଳାଉଥିବା ବେଳେ ଅର୍ଜୁନ ନିଜର କ୍ରିକେଟ୍ କ୍ୟାରିଅର୍‌କୁ ଫୋକସ୍ କରିଛନ୍ତି ।

ବିବାହର ପରଦିନ ଅର୍ଥାତ୍ ଶୁକ୍ରବାର ଅର୍ଜୁନ 'ଡିୱାଇ ପାଟିଲ ଟି-୨୦ କପ୍'ରେ ଖେଳୁଥିବା ଦେଖିବାକୁ ମିଳିଥିଲା । 'ଡିୱାଇ ପାଟିଲ ବ୍ଲୁ' ଦଳ ପକ୍ଷରୁ ସେ ଏହି ସେମିଫାଇନାଲ୍ ମ୍ୟାଚ୍‌ରେ ଅଂଶଗ୍ରହଣ କରିଥିଲେ । ତେବେ ଏହି ମ୍ୟାଚ୍‌ରେ ତାଙ୍କ ପ୍ରଦର୍ଶନ ଆଶାନୁରୂପ ହୋଇନଥିଲା । ବ୍ୟାଟିଂ କରି ସେ ୧୪ ବଲ୍‌ରୁ ମାତ୍ର ୯ ରନ୍ ସଂଗ୍ରହ କରିଥିଲେ ଏବଂ ବୋଲିଂରେ ଗୋଟିଏ ଓଭରରେ ୨୦ ରନ୍ ବ୍ୟୟ କରିଥିଲେ । ତାଙ୍କ ଦଳ ଏହି ମ୍ୟାଚ୍‌ରେ ପରାଜିତ ହୋଇଛି ।

ସଚିନଙ୍କ ପ୍ରତିକ୍ରିୟା:
ପୁଅର ବିବାହ ପରେ ସଚିନ ତେନ୍ଦୁଲକର ସୋସିଆଲ ମିଡିଆ 'ଏକ୍ସ' (X)ରେ ଏକ ଭାବପ୍ରବଣ ପୋଷ୍ଟ ଶେୟାର କରିଛନ୍ତି। ସେ ଲେଖିଛନ୍ତି, "ଅର୍ଜୁନ ଓ ସାନିଆ ଜୀବନର ଏକ ନୂଆ ଅଧ୍ୟାୟ ଆରମ୍ଭ କରିଛନ୍ତି। ଏହି ଅବସରରେ ଆଶୀର୍ବାଦ ଓ ଭଲପାଇବା ପ୍ରଦାନ କରିଥିବାରୁ ସମସ୍ତଙ୍କୁ ଧନ୍ୟବାଦ ।"

ପରିବାରରେ ଖୁସିର ମାହୋଲ ଥିବା ସତ୍ତ୍ୱେ ଅର୍ଜୁନଙ୍କ ଏଭଳି କ୍ରିକେଟ୍ ପ୍ରତି ଆବେଗକୁ ନେଇ କ୍ରିକେଟ୍ ପ୍ରେମୀମାନେ ଭିନ୍ନ ଭିନ୍ନ ମତ ରଖୁଛନ୍ତି ।